採訪：廖潔雯
下午二時左右，旺角朗豪坊商場外，砵蘭街通往旺角地鐵站的小巷，有一檔五十呎的報紙檔，檔主英姐忙著應付一個一個前來查詢的客人。
身穿綠色T-Shirt的少年：有無蘋果（日報）呀？
英：三點有貨，而家好多人搵緊呀
一名穿著連鎖醫療機構的「姑娘」伸手掀起報檔當眼位置的《星島日報》
女客人：賣晒喇蘋果？
英：三點零鐘，三點鐘有二百份。
女客人：三點鐘呀？可唔可以留畀我，一陣落嚟攞得唔得？
英非常爽快地回應：你留幾多份呀？
女客人：五份囉
女客人：五份？你唔好太晏喎，我留左畀你先
八月十日，港警國安處以違反國安法及其他刑事罪名，拘捕壹傳媒創辦人黎智英、他的兒子及公司高層。同日上午，約二百警員進入蘋果日報大樓搜查，除搜查相關人士的辦公室，有警員翻閱蘋果日報記者的文件及新聞材料，被傳媒及公眾質疑違反搜查令及損害新聞自由。
翌日，多區報檔出現人龍，市民為表支持蘋果日報，紛紛搶購該報。蘋果日報第一批印刷為三十五萬份，為平日的印數七萬份的五倍，市面仍然一紙難求，隨後加印二十萬份至五十五萬份。
我在報檔旁邊拍攝，問英姐：今日你賣咗幾多份蘋果日報？
英：舉起兩手指
疫情關係，英姐帶口罩賣報紙，但依然看到她開心得彎起的腰果眼。
我：二百？（英搖頭）二千？（英點頭）
英笑著歎氣：唉，好攰（轉身對拿著瓶裝水的客人）六蚊！
英收錢，找錢，快手快腳。
英：一日之嘛，但《蘋果》一死咗就慘喇，我一日賣50份《蘋果》，我賺大約一蚊一份，我有五十蚊賺，但係無咗《蘋果》嘅話，我嗰五十蚊無咗，但啲人唔會轉睇《東方》，唔會轉睇《明報》㗎嘛。
頭髮梳得熨貼，年約八十歲，身穿白色Polo裇衫的伯伯慢慢走近英姐的報檔，問：有無《蘋果》呀？。
英：三點零鐘丫，三點零鐘有。
伯伯：《蘋果》唔係印多二十萬份咩？
英：都賣晒喇！
伯伯失落地站在報檔前，問：今日啲人做咩呀？
英：買嚟睇囉！而家你想愛（要）乜嘢？
伯伯：《蘋果》囉！
英姐彎下腰，從腳旁的暗格抽出一份私伙的《蘋果日報》：我畀你先啦！
伯伯心花怒放，笑著數硬幣：唔好意思，攞走你啲心愛嘢，哈哈
報檔內的時鐘顯示零時二時三十分，我趁著新一批報紙到埗前的空檔時間，向英姐打探今日的有趣事。
回歸後首次「搶報紙」
八九六四，全港報章均告售罄。
英告訴我今日有很多年輕人買報紙，支持蘋果日報，有些客人在港島南區走了十多間報檔和便利店都找不到一份《蘋果日報》。然而，眾多畫面之中，英認為最難忘的竟然是會有人在英的報檔前免費派《蘋果日報》。
英手指報檔前的紅綠燈柱，說：有個後生仔揸住十份《蘋果》喺度派，有個男人攞左一份，諗住畀返錢，但後生仔話唔收，跟住嗰個男人就向我買十份畀個後生仔，等佢派畀第二啲有心人，然後陸陸續續好多人跟住咁做喇，有啲人買兩份，畀一份佢派，有時都要衡量自己能力，有啲年紀大少少，買十份畀佢囉，有啲人甚至買二十份畀佢，所以嗰段時間我啲《蘋果》賣得特別快。
男客人打開飲品雪櫃，取出一罐咖啡，英姐：五蚊，多謝晒。
英姐一眼關七，一邊跟我聊天，一邊收錢找錢，硬幣撞入筲箕噹噹作響。
我：以前有無試過咁好賣？
英：未試過，任何報紙都未試過，除左六四之外。
我：六四嗰陣？
英攤開手，在放滿各大報章的枱上掃了一下，說：六四嗰時，乜嘢報紙都賣晒！
英慢慢解釋，當年資訊不及現在流通，一般人主要從報章、電視及收音機來接收資訊。由於港人渴望了解六四事件，任何立場的報章都售罄。
英手指其他報紙，說：「而家呢啲都無人搶，淨係搶一份（蘋果日報）之嘛，但係六四係乜嘢報紙都搶！」
《蘋果》終於返貨
下午三時十分，英姐拉下口罩，吃著麵包，四處張望。這時，粉紅頭髮、半祼上身的紋身男推著手推車將二百份的《蘋果日報》送到英姐的報檔。英姐將剩餘的麵包急急送進嘴裡，罵道：「作死你呀！咁鬼耐！」
紋身男笑。
兩人快手快腳將報紙搬到枱上，英剪開縛在報紙上的黃膠帶，將娛樂版夾入港聞版內。報檔前經過的行人看到英姐在「叠報紙」，紛紛上前購買。
男客人：《蘋果》到左啦，係咪呀？
英：到左，要幾多 ？
男客人不好意思地舉起一隻手指：一份
英：唔緊要，一份半份，支持佢就得，心意丫嘛
另一女客人驚喜問道：有喇？
英：有喇，幾多份？五份？
英姐趕緊將手上叠緊的報紙數一數：「五份，九五四十五，四十五蚊」，《蘋果日報》原價十元，英姐報檔的日報賣九元，旨在薄利多銷。英姐收下一百元鈔票，找回五十五元，說了一聲多謝，便繼續密密疊報紙。
「臨時伙記」幫拖疊報紙
手忙腳亂，行家幫拖。一名灰衫四眼叔叔走向英姐的報檔，手上揚起一份《蘋果日報》
四眼叔叔：雞煲店嗰邊有人派呀，所以我拎多左一張
英：今日有好多人都買嚟派
四眼叔叔熟練地替英姐疊報紙，好讓英姐專心地應付潮水般的客人。
我問四眼叔叔：你嚟幫老闆娘呀？
四眼叔叔：係，（再想一想，笑道）唔係呀，我係佢伙記
英雙手繼續收錢找錢：你痴線㗎，臨時伙記呀，佢唔抵得我慢呀！
我：你有無睇開邊份報紙呀？
四眼叔叔雙手不停叠報紙，用下巴指著跟前的報紙：睇《蘋果》
四眼叔叔收下十元，轉手交給英姐：「找一蚊！」
我：你睇咗蘋果幾多年？
四眼叔叔：我？有《蘋果》第一日，我已經做緊《蘋果》，我幫《蘋果》（派）發呀！
四眼叔叔說當年《蘋果日報》創刊，還未有自家印刷廠房，在元朗的印刷廠印刷，早上八時才有第一批報紙，四眼叔叔負責將《蘋果日報》派發旺角區的報檔，所以跟旺角一帶的報檔都非常熟絡。
英：我哋個個睇住蘋果出世㗎
四眼叔叔和英姐一唱一和，告訴我《蘋果日報》創刊初期，以低價兩元出售，隨報還附送蘋果一個。不過這種市場競爭手法卻令很多小型報館紛紛倒閉。
四眼叔叔已疊好所有報紙，手指公已被報紙墨水染黑，此時卻發現多了一份娛樂版。
四眼叔叔：吓？點解會多咗張底（娛樂版）？
英：好呀，咁啱今日我多咗兩份面（港聞版）。
英姐馬上拿出之前多出的港聞版，快手將娛樂版夾起。
英向四眼叔叔：而家有你幫我手賣，幾撚過癮呀，呢度收錢，呢度找錢，笑到仆街。
四眼叔叔打開他的側揹袋，取出一份《蘋果日報》，悄悄告訴我：我無呃你㗎，我日日都要儲返一張，習慣嚟。
我：邊張呀？
四眼叔叔手指著港聞版：呢張囉，做報紙嘅人係咁㗎，你做過嗰間報館，你就會Keep住嗰一張，儲到成屋都係
我：創刊嗰份你都有？
四眼叔叔：梗係有啦，幾珍貴呀，寶藏嚟㗎（開心笑）
我：頭版係啲咩？
四眼叔叔：唔記得喇，哈哈，返去睇下先知。
四眼叔叔來去匆匆，又太好傾談，我掛住拍攝和傾計，全程都唔記得四眼叔叔大名。
長者無茶飲 年輕人被搜袋
一小時過去，英姐的二百份《蘋果日報》已賣清光，又開始跟熟客打牙骹。
客：今日好多差佬
英：平時都係咁，見你黑衫黑褲，搜下你個袋
熟客看看自己的衣著，今天果然穿了黑衫黑褲。
客：搞到我啲生活都改變晒
英：聽日有茶飲喇，稻香開喇
客：我唔飲稻香㗎，請我都唔去
自從旺角稻香酒家的慶回歸群組多人確診新冠肺炎，酒樓已停業一個月。英姐說旺角老區長者大多看《東方日報》，酒樓瀕瀕傳出確診個案之後，長者到茶樓「飲啖茶，嘆報紙」的日子已不復再，間接影響了英姐的收入。
英姐望著不遠處的商場出口，五個警員同時搜查一個少年。近來旺角巡邏的警力增多，不時見到在街角有四、五個警員在站崗，眼睛掃視路過的行人，警車閃過不停，突然又會有一隊警員從警車衝出急步走。
可是，這一個小時之間，不遠處的警員已多次掃視買報紙的客人，今日香港，行街、食飯、買份報紙都被監視。
