人和貓狗命運一樣，命在根上，並不是說走就可以走。
受新界東北發展計劃影響，區內貓狗失家園。據東北反逼遷動物戰隊三年前的調查，估算整個新界東北發展區受影響的動物數量有近4000隻，惟漁護署一直沒有實際備存數字，亦沒有承諾之後有統計。去年7月起，陸續有居民需要遷離，有些居民遺棄貓狗在原野。
根據發展局向北區區議會提交的資料，願意接收受發展影響的動物的動保組織共七個，當中包括愛護動物協會(SPCA)、香港拯救貓狗協會(HKSCDA)、保護遺棄動物協會(SAA)、救狗之家(HKDR)、寵聯慈善協會(Paws United Charity)、保護動物慈善協會(LAP) ，還有阿棍屋，現在阿棍屋內有一半是老狗，三分之一是患病的狗，收養的狗「有入無出」，乏人領養，，阿棍屋創辦人Ivy (謝婉儀)願意做牠們的「擺渡人」。
鄉郊動物難適應 籠中生活感壓力
阿棍屋目前已收養十多隻來自新界東北的狗隻，但給機構收養是否東北動物的唯一出路？
踏進阿棍屋，有股淡淡的動物排泄物味道撲面而來。鐵皮屋被接近一米高的柵欄分隔成不同區域，有龜池，貓房、雀鳥房、羊區、大狗區、小狗區及照料房間。此起彼落、沒完沒了的狗吠聲，加上場地面積之大，在屋內的人需要用電話溝通。Ivy 接到電話不久便匆匆走來，領著我在阿棍屋走一圈。羊群、龜群、小狗、小貓等見到她都會走近。唯獨是大狗，眼見有陌生人便在籠中跳躍嗚叫。
牠們是來自新界東北的狗隻，部分已到阿棍屋一年，年齡介乎2-10歲。
Ivy說，牠們是最難適應的一群。阿棍屋其他狗隻不少是被遺棄，牠們原先在屋中照顧，不難適應。但來自鄉郊地區的狗隻習慣自由，活動空間非在一個籠，突然要在籠中生活，有很大壓力，「有啲嚟到，不停地咬爛你的籠，咬到爛晒；係咁吠、不吃東西」。她形容，東北狗隻起初很有攻擊性，「會『嗚』我哋，會想咬我哋。有試過畀佢哋咬。都有啲傷。唔係隻隻狗仔性格咁溫和。」
「我咁樣收佢喺籠，對佢嚟講好咩？唔好架其實。有啲嚟到唔食唔飲水，唔係好事。」Ivy 無奈說。
Ivy說，最好當然讓牠們在原來的地方生活，可惜不可能，即使將牠們送往另一鄉郊地方也不會適應，「佢哋慣了那個地方，那股氣味，狗係靠氣味。靠熟悉地方才會安心。畀佢一個新地方，去邊屙尿又唔知，去邊搵嘢食又唔知，屋企喺邊又唔知，冇晒佢以前浸味呀嘛。」
狗隻在阿棍屋生活至今近一年，Ivy說牠們的狀況有改善，對人沒以往反感。這些小狗個性忠心，接受不了「主人」以外的人，「我哋而家日日有畀嘢佢食，佢先信我哋，對我哋有改觀，先當我哋係好人，先叫係可以摸佢，上狗帶。」
領養機會微 狗隻大部分「有入冇出」
但Ivy認為，牠們能出領養的機會較微。她解釋很多時狗都是「有入冇出」，尤其是成年唐狗。十多隻鄉郊狗隻當中，只有一隻性情溫馴、毛色特別、「靚靚仔仔」的，曾被Ivy帶往領養日，曾有人填表申請領養。不過申請人到阿棍屋探訪了小狗一次就放棄申請，原因不詳。
「好難先出到一隻成犬嘅唐狗，好難。BB就好好，好快出晒(有人收養)，因為佢BB。同埋有品種如柴犬、哥基、貴婦，有品種係好啲嘅，但係年紀在十歲以上呢就難啲。如果愈細隻，如唐狗BB或名種狗仔，佢哋申請機會係真係大好多，領養機會大好多，點解呀，因為佢哋細。」
有人曾向她查詢，「有冇啲精靈活潑可愛健康聽話的狗仔？」，她無奈，但明白一切講求緣份。
人揀擇，有時狗也會揀擇，「狗仔有時對人沒反應，但對某一個人很有感覺，係主動會叫佢摸佢。我成日都話唔係我揀，係佢哋自己揀，佢哋都有感受，鍾意邊個多啲。」在阿棍屋申請領養，需要與小狗見面三次，希望雙方有互動，「狗仔都認人嘅，有個溝通，咁你帶佢返屋企就易啲，唔係返到屋企，佢又唔識你，你又唔識佢，點照顧呢？」
盡力救助動物 做個擺渡人
場內的狗隻，一半是老狗，三分之一是病狗，大部分均被前主人遺棄。老犬病犬均由她親自照顧，難以交託同事，「狗場太多狗，你都要叫到名先得架，嗌唔到名鬼睬你咩。」但老弱的小動物，每隻都需要花心神照顧，「這一隻走不動，要定時定候抱佢出去晒太陽，鬆下筋骨，有狗仔每日都要滴眼油⋯⋯。」
百般用心，只想為逝世小狗做些事。取名「阿棍屋」源自她的洛威拿寵物狗「阿棍」。阿棍兩、三歲時，Ivy把牠從繁殖場救出，但帶回家後發現牠甚害怕棍狀物體，例如當Ivy拖地時，阿棍會變得十分緊張，相信阿棍成長時有過不愉快經歷，故名「阿棍」，盼牠從此不怕棍。阿棍與Ivy同期生了場大病，Ivy挺得過，阿棍卻挺不住，「唔知點解會想去一個地方為棍做些善事⋯⋯好多時都好似上天注定。」
她說，最困難是要說服自己繼續做這件事。瘦削的Ivy每天早上睡醒就要清去地上的屎尿、餵生病的動物吃藥、帶動物覆診、有時去漁護署、處理求助、回覆查詢及訊息等，可睡覺時已至凌晨兩三時，「規律的生活」永無休止，「都攰呀講真」。
但她接受上天安排，甚至不會記恨那些遺棄動物的人，「佢哋搵得你，搵個地方送佢過嚟，都係畀咗個機會佢，都叫係一個生存機會。係唔啱架，但都畀咗個機會佢哋生存，唔係佢哋就唔會左揀右揀，揀呢到啦。」
「我只係一個擺渡人，我將呢個生命妥善地送去一個地方⋯⋯在我（情況）最壞最差時，對上天承諾，希望佢畀一條出路我，我相信呢個就係我的出路。」
