何俊仁及其餘八名民主派人士分別被控一項組織未經批准集結罪，以及一項參與未經批准集結罪，今早8.18流水式集會案判刑，何俊仁被判12個月，緩刑24個月，當庭釋放。在判刑前一天，何俊仁仍在其律師樓忙過不停，接受訪問時他表示有心理準備入獄，如果一旦判入監獄，算得上是「一種Relief」，「見到咁多老友坐監都感同身受，啲親人全部都識。（我）入到去坐，某方面都係一種relief 嚟。喺出面日日瞓唔著，有好多案做唔停要掛心，冇人會enjoy坐監，但就當俾我喺入面休息一陣喇。」
見證首個百萬人遊行 三十三年民主路路難行
何俊仁在判刑前一天的早上，到不同的收押所四處奔波，探望因反送中運動而入獄的在囚者。身為律師的他在過去三十多年來，一直投身於香港民主運動，他曾想像過被政權禠奪自由，「點會冇諗過，只係估唔到呢一兩年嘅逆轉咁快。」
2019年6月，過百萬人遊行反對「逃犯條例」修訂草案，令不少人憶起1989年5月21日，一百萬名香港人為支援在北京抗爭的學生而走上街頭。由遊行到支聯會成立，何俊仁至今仍然歷歷在目，「當時搞公司註冊、向馬會租場辦『民主歌聲獻中華』，幾日就搞掂喇！即使係2000年打後，你唔申請任何野去集會，只要場面和平，你都知一定唔會被捕或被告，但而家已經冇呢支歌仔唱。」
何俊仁分析，2016年的本土主義興起，令中共政權有感特區政府無法依中央旨意管理香港，加快推倒香港作為民主、自由的陣地，只是支聯會當時並不是優先被打壓的對象。何俊仁感慨香港人與中國人有著共同的命運，「如支聯會將來被政權強行解散，都只係整個政治局勢嘅小縮影。我面對嘅處境其實係全香港嘅人，甚至係被中共打壓嘅人都要面對嘅厄運。」
不忘牆內戰友 面對入獄感平靜
他不苟言笑地說自己已比不少戰友幸運，被告的是公安條例，而不是國安法，「反送中期間，好有多人要坐，其中用國安法起訴嘅全部唔知刑期，保釋都無得保。更唔使講大陸嘅維權人士，被囚一年後都唔知有冇得見律師，仲有幾多酷刑、精神折磨。」
目前身負四宗案件，何俊仁估計今年的6月4日及年底的70歲大壽將會在獄中渡過，他笑言，「入去坐，某方面都係一種relief，喺出面瞓唔著，每日都有好多案見唔停，就當俾我喺入面休息一陣。」他又指現時內心平靜，寄語港人仍要懷有希望，「歷史唔會凍結咗喺呢個時刻，唔會凍結咗喺呢個專制嘅政權。總會有人推進，咁我哋只需要盡力做好自己嗰個部份。」他指即使無法參與六四晚會，亦會在獄中參與悼念六四及閱讀相關書籍，「我人喺香港，個心同大家都連埋一齊。」
悼念不需大台 面對打壓靠港人自發
去年的六四晚會是三十年以來首次不獲警方發出「不反對通知書」，支聯會何俊仁認為往後舉辦與六四相關的活動會變得很艱難，惟他相信人心不會被泯滅，「如果真係冇得再搞燭光晚會，相信有心嘅市民都會用自己嘅方法點起燭光。悼念唔需要大台，香港人可以好醒目。」
