抽象藝術工作者Vera Chiu首次在港島區舉辦畫展，上星期五在元創坊開幕，主題為「釋放 Release」。畫展展出19張幅抽象畫作品，被問到抽象畫的閱讀門檻對門外漢會否太高時，Vera指畫作雖然由個人情感出發，但創作者與觀眾活在同一個地方，作品會勾起共同經歷下的相似情緒，更有一大部份因社會動盪後及疫情而未能得到梳理，亦是是次展覽想帶出「釋放」的訊息。
It’s ok to be sad.
Vera今年年頭落戶坪洲，專注其藝術相關工作，包括開辦不少入門工作坊，令學員認識到抽象畫之餘，參與其中時能釋放自身情緒。而是次畫展是由藝術平台「UBU Deco」邀請她以「釋放」為題作展覽，Vera認為她的近期的生活經歷，以至整體社會氣氛都需要被釋放，「釋放呢個主題好解釋到我嘅artwork，個人嚟講，我今年搬咗入坪洲係一種釋放。搬左入嚟，我先知自己有時唔太認同自己做緊嘅野，或者係否定畫作入面嘅情緒。嗰陣先發現，原來我好刻意要避免負面野，搬入坪洲後，我知道要認識返我嘅畫入面係有負面情緒㗎喎。」
展覽廳內有三幅畫作的顏色運作十分引人注目，是Vera在2014年雨傘運動後創作的，第一幅作名為「the city is dying」，她把七彩繽紛的油彩唧到畫布上，再讓油慢慢向下流動。Vera解釋道：「好像流淚般的城市，但其實係好有希望，因為落嘅雨有好色彩喺入面。下雨嘅形容係送畀2014年後嘅香港。呢幅畫今時今日擺返出啲，我個心都無變過，雖然過咗七年，但我依然對呢個城市有希望。希望在於人，唔係因為個體制。只要啲人喺度，就仲有希望。」
另外兩幅畫作分別叫「white experiment」和「black experiment」，就是分別在白底和黑底的畫布上潑墨，再把原來已十分漂亮的潑墨畫用白色或黑色油漆重新覆蓋著。
「呢兩幅比較得意，原來其實潑完墨，大家都會覺得『已經好靚，係完成咗嘅作品』。而experiment嗰個位係，當你願意喺好靚嘅嘢上面再加多層嘢，去跳出你嘅comfort zone，去你敢唔敢冒險，就可以創作到更靚嘅嘢。」
回顧創作的價值
「玩藝術」很難，在香港「玩藝術」更難。籌組了三兩個月的畫展，背後是花上十數年的練習及心理建設，「要經歷個種自我價值嘅質疑，特別係artist。你要幫自己嘅作品定價，同人解釋你的作品定價點解會咁高或者咁低。同時，你又maintain創作嘅開支、交租、其他生活嘅需要。做得多workshop、artwork，面對得多自我質疑，就會開始慢慢識得欣賞自己嘅作品，知道自己真係有progress，係有價值，咁就會堅持咁做落去。」畫展內最大幅的作品，是由Vera儲存十年之久的個人物品，包括一些舊相、postcard，去表達青年時代的感受，回顧過去對個人生活及創作之心路歷程。
過去一年，Vera 舉辦不少工作坊，以不同情緒作為主題，希望為大家提供情緒出口，「呢兩年社會動盪、疫情，其實一早好需要release。大家活喺一個咁壓抑嘅城市，呢兩年爆發嘅release係好瘋狂。大家上街又好，嗌口號又好，都係抱住咗好大嘅憤怒去講出不同訴求，大家一早已經有呢個情緒，只係一直都無機會釋放。所以其實我無一幅係特別有好政治性，但呢個環境點都會影響到我情緒上嘅發洩，而某程度上都會同大家有個共鳴。」
在籌備下一場展覽前，Vera會多花心力續辦工作坊，「嘗試用潑墨、噴漆等介入情緒面，等大家理解完自己嘅情緒後，都有個release嘅途項。之後都會想用自己嘅抽象畫作去製作一套Oracle Cards（天使卡），等大家抽到不同卡之後，睇後面對畫作嘅解釋可以有啲啟示，去同自己對話，同情緒同處。」
